خربشات محمد عبد الماجد صفحة متجدده

من طرف اسير الظلام الإثنين يونيو 08, 2009 6:08 am

* فات علينا اهم الاحداث واجلها.. في الفترة الاخيرة في ظل انشغال الكل بوصول البرازيلي كامبوس.
* فات علينا احلي الاخبار واعظمها وهو (اشهار) لاعب الهلال المحترف امبيلي لاسلامه في حضرة هلالية في مسجد الشيخ محمد خير.
* هذا الامر يعني ان الرياضة فعلا لغة تواصل وتلاقي بين الشعوب وفضل الهلال سوف يكون كبيرا ان شاء الله وهو يهدي امبيلي للاسلام.
* امبيلي علاقته بالاسلام كانت جيدة وهو في الهلال السعودي وكان الطريق له ممهدا ليدخل للاسلام حتي اذا جاء للهلال السوداني كان للهلال السوداني اجر ان يهتدي رجل بفضله.
* الرسول عليه افضل الصلاة والتسليم يقول Sad

لأن يهدي بك الله رجل واحد خيرًا لك من حمُرالنعم).
* لذلك فان فضل الهلال من ذلك كبير.
* الاشياء في الهلال لها سماحة الاسلام وفضله .. ولعل ذلك جاء من ان تسمية الهلال نفسها. حيث خرجت مجموعة من مؤسسي الهلال ليجدوا هلال رجب في هلته الجميلة فكان منهم ان يقرروا تسمية الفريق الذي يجتمعون لتسميته باسم الهلال.
* غير ذلك فان (الهلال) في الاصل رمز اسلامي معروف ومتفق عليه .. لذلك كان للهلال ان يفوز بذلك الفضل.
* هلال السودان هو صاحب الاسم .. لأنه كان الاول في التسمية من بعد ظهر هلال السعودية .. ويوجد الان هلال في قطر وهلال في اليمن وهلال في فلسطين وكلها كانت تيمنا بهلال السودان.
* يبقي دور الهلال كبيرا في الجانب الانساني.
* من قبل دخل الاسلام عبر الهلال محترف الهلال السابق الكنغولي (انقيدي) ... ودخل في الاسلام ايضا عبر بوابة الهلال المدرب الالماني (ميكلوس) الذي كان يدرب الهلال.
* هذا يوضح الدور الاجتماعي العظيم الذي يقوم به الهلال .. لاسيما وان نشأة الهلال في الاصل ارتبطت بابعاد وطنية نبيلة وباهداف ديمقراطية بعيدة فهو نادي الحرية وهو نادي الخريجين.
* الاعتناء بهذا الدور امر مهم للغاية ... لأن هدف الهلال لم يكن في يوم من الايام كرة القدم وحدها.. حيث نحسب ان الكرة يمكن ان تكون وسيلة لغاية كبيرة.
* الملاحظ ان هنالك رياضيين قاموا بادوار عظيمة لخدمة الاسلام ولتقديم صورة مختلفة عن الاسلام بعد الصورة غير الحقيقية التي يعتقدها سكان العالم الاول عن الاسلام.
* الملاكم العالمي محمد علي كلاي .. اجتهد كثيرا لتقديم صورة جيدة عن الاسلام ويتحرك الان مجموعة من النجوم في اندية عالمية كبيرة لتعريف الناس بالاسلام خاصة ان نجومية اولئك اللاعبين قد تكون وسيلة مساعدة لهم للوصول.
* لا نقصد بهذا اننا نرمي علي لاعبي كرة القدم ان يقوموا بمهام اسلامية وان يبلغوا عن سماحة الاسلام فهذا امر اعظم واجل.. ولكن نقول انهم يمكن ان يكونوا وسائل مساعدة .. خاصة ان النجوم في اوروبا وفي امريكا لهم كلمة مسموعة وهم في الكثير من الاحيان يكونوا اسوة للاخرين.
* المنتخب الفرنسي فيه مجموعة كبيرة من اللاعبين المنتمين للديانة الاسلامية.
* غير ذلك فان غالبية الافارقة المحترفين في الدوريات الاوربية دينهم الاسلام.
* لذلك يمكن ان يكون (الحوار) طريقا ليسلم الاخرون وليهتدوا .. خاصة ان الدين الاسلامي دين شوري وحوار وحرية.
* وليس بعيدا من هذا تحدث الكثير من البشريات.
* اوباما الرئيس الامريكي ذو الاصل الكيني تحدث عن الاسلام في خطابه الموجه للعالم الاسلامي في زيارته الاخيرة للقاهرة حديثا جيدا وقد بدأ حديثه بالسلام عليكم .. كما استشهد في خطابه بآيات قرآنية كريمة... ووضح ثقافته الاسلامية الجيدة واعترافه بالحضارة الاسلامية وبسماحتها.
* هذا يعني ان الاسلام بفضل الله يمضي بعيدا ويبلغ مشارق الارض ومغاربها .. لذلك فان اي فرد يمكن ان يقوم بدور يخدم به الاسلام .. حسب المستطاع وحسب الطاقة.. في ظل الظنون التي يعتقدها البعض عن الدين الاسلامي.
* اوباما (الاسود) الذي بلغ البيت (الابيض) .. يملك حسب تربيته ونشأته معرفة جيدة عن الاسلام ... وكل من يعرف الاسلام يكون قريبا من الهداية.
* لاعب برشلونة الفرنسي (تيري هنري) اشارت بعض التقارير الي اسلامه وان كان هو قد اكد في قناة الجزيرة انه قريب من الاسلام.. ولم يؤكد اسلامه بصورة قاطعة.
* ما يهم هو ان الاسلام يمضي بعيدا.
* نعود الي الهلال ونقول ان النيجيريين الذين لعبوا في الهلال عرف عنهم التمرد والخروج احيانا من النص ولا ننسي تصريحات وارغو الاخيرة التي قال فيها انه لم يستطع التأقلم علي الحياة في السودان .. غير الذي قاله عن الدين الحنيف وهذا يؤكد انهم بعيدون من التقاليد الاسلامية والاعراف النبيلة.
* لذلك من الافضل ان يحاول الهلال ان يبتعد من التعاقد مع محترفين من نيجيريا بقدر الامكان بعد ان ثبت عدم انضباطهم والتزامهم.
* كلتشي (باع) الهلال وقبض الثمن وهو لاعب في الهلال وقودوين مازال (يلف ويدور) .. غير هذا فان مشاكلهم كانت كثيرة وكانوا لا يلتزمون بالتاريخ الذي يحددوه للعودة عندما يسافرون الي نيجيريا... وهذا نموذج بسيط لتسيبهم.
* هذا شيء تؤكده الان عودة ديمبا وامبيلي في الموعد الذي حددوه بينما نجد ان (امولادي) سافر متأخرا الي بلاده .. كذلك تأخر محترفو المريخ كلتشي وايداهور وارغو .. مما يثبت تسيب اللاعب النيجيري.
* نتمني ان ينجح الهلال في انهاء تعاقده مع اللاعب امولادي ليدخل كشف الهلال كنغولي اخر هو كابوندي.
* ملحوظة: وقولوا يا لطيف.
هوامش
* يلعب منتخبنا الوطني اليوم مباراة مهمة جدا امام نظيره البنيني .. ورغم كل الارهاصات .. ورغم المخاوف والمشاكل التي قيل ان مدرب المنتخب الوطني اثارها اتوقع ان يخرج اليوم منتخبنا الوطني بنتيجة جيدة.
* قد يرد اليوم قسطنطين علي كل الذين انتقدونه .. وقد يكون وسيلته للرد مهند الطاهر ان شاء الكريم.
* نتوقع نتيجة جيدة للمنتخب السوداني ان شاءالله.
* نسأل الله ان يوفق اليوم منتخبنا وان يعود لنا من بنين بالنقاط الثلاث رغم حضور محترفي بنين.
* املنا في السودان يبقي كبيرا اليوم.
* المنتخب المصري مهمته اليوم امام المنتخب الجزائري شبه مستحيلة.
* برانكو وضحت لمساته الدفاعية العالية علي منتخب رواندا.. وخسر منتخبه بصعوبة من امام منتخب زامبيا الذي يلعب علي ارضه.
* الاهلي المصري علي طريقة (تمهل الهلال) مازال يبحث عن مدرب.
* ح نفك الهلال ونمسك في الاهلي المصري.
* يبدو ان في (التمهل) السلامة وحسن الاختيار وفي التعجل الندامة ورادان.
* معسكر المريخ في الاسماعيلية هل سوف يكون (للشنط) فقط؟.
* الهلال عندو ثلاث تشكيلات ... تشكيلة في بنين .. وتشكيلة في القضارف وتشكيلة في غرفة التسجيلات.
* هل يروي الهلال اليوم عطش القضارف؟.
* من قضارف الخير سوف يشاهد كامبوس الهلال .. والبداية من القضارف فيها الكثير من الخير.
* من الحسن ان ترك مجلس الهلال امر المشاركة في سيكافا لتقديرات المدرب كامبوس.
* نحن نفضل ألا يشارك الهلال في تلك البطولة التي لا قيمة فيها.
* التمارين سوف تكون افضل للهلال من المشاركة في هذه البطولة.
* معسكر الهلال الخارجي يجب ان يحسم امره سريعا ... واذا نجح الهلال في ان يعسكر في ايطاليا سوف يكون في ذلك دفعة قوية للاعبي الهلال وللقاعدة الجماهيرية.
* كامبوس يحتاج الي ان ينفرد بلاعبي الهلال وان يدربهم بعيدا عن الجماهير في الفترة القادمة وهذا لن يكون إلا بالسفر الي ايطاليا .. لأن الخليج نفسه سوف يكون فيه تزاحم علي الهلال من الجاليات هناك.
* اما التمارين في الخرطوم فسوف يحضرها جمهور كثيف وكبير .. قد يفقد اللاعبون تركيزهم .. خاصة ان المدرب جديد ويحتاج الي تلقين تدريباته وخططه في هدوء وبعيدا من الجماهير.
* غير ذلك فاننا نفضل ان يبقي (شوق) جماهير الهلال للفريق كبيرا حتي اذا انطلقت مرحلة المجموعات يكون التدافع والتدفق الجماهيري كبيرا.
* لذلك نفضل ان يكون اول ظهور للمدرب كامبوس في الخرطوم في اللقاء الذي يجمع بين الهلال والمريخ في المجموعات.
* وان كان الهلال يحتاج الي جماهيره في الاسبوع الاخير قبل مباراة القمة.
* المريخ سوف يعرض نفسه للجماهيره في سيكافا فيملوه.
* من المهم ايضا ان يحسم الهلال امر مساعد المدرب ... لأن كامبوس في فترته الاولي سوف يكون محتاجا لمساعد وطني.. علي الاقل يكون حلقة وصل بينه وبين اللاعبين.
* كما اشار الزميل كبوتش فان المعارضة في الهلال سوف تنسحب تماما بعد اعلان قيمة التعاقد مع المدرب البرزيلي كامبوس.
* يا عماد الطيب قول ليهم مرتب المدرب كم؟... عشان ننتهي من اللخمة دي.
* القضارف الليلة ح تنور .. وح تشرب موية كمان.
* والقضارف اصلا منورة باهلها.
* خبر عاجل: طمبل قال عندو (صورة) ناقصة.

من طرف ملك الجو الخميس يونيو 11, 2009 12:16 am

اخي اسير الظلام اسمح لي بان اعبر عن اعجابي بالاستاذ محمد عبد الماجد
وباختيارك الموفق وتقبل اضافاتي

من طرف ملك الجو الخميس يونيو 11, 2009 12:18 am

مهم جدا .. ان يحسم المريخ امر تلك (الملفات) التي لا نعرف الي اين ستقود المريخ.. وكيف سوف تكون خاتمتها؟.
* نتعجل ان يحسم المريخ امر تلك الملفات .. حتي يطيب لنا الانتصار في المواجهة الافريقية.. لأن هذا التمهل الذي يمارسه المريخ سوف يُعجل بخسارة المريخ في اول ثلاث دقائق .. ونحن نطمع ان تكون المواجهة الافريقية قمة بحق وحقيقة.
* خوفا من ان يشيلوا الكورة ويطلعوا.
* اذا استمر المريخ بهذا الوضع فان مصير المريخ سوف يكون مصير اشراقة القضارف.
* وربما يكون الفرق الوحيد في (الطابق التاني).
* قضية طمبل الان تشغل المريخ ... وتشكل عليه ضغوطا وهواجسا توضح حتي في تصريحات اللاعب.
* من الافضل ان يستفيد المريخ من الوقت ويبحث مبكرا عن بديل لاللاعب طمبل .. والبحث لن يكون صعبا علي المريخ .. لأن طمبل في الاصل يجلس في الاحتياطي.
* البحث عن لاعب احتياطي امرا ليس صعبا .. لكن مع هذا يجب ان يتحرك المريخ منذ الان ليجد بديلا مناسب لطمبل.
* ايضا هناك قضية قلق التي لا يعرف المريخ كيف سوف تكون نهايتها ولجنة الانضباط في كل مرة تأجل اجتماعها الي يوم اخر.
* متي تجتمع لجنة الانضباط؟.
* ناس المريخ من حقهم يعرفوا ان كانوا سوف يستفيدوا من خانة قلق في يونيو ام لا ؟.. لأن قلق اذا اوقف عامين فمن الافضل ان يبحث المريخ عن بديل لقلق... بديلا من ضياع خانة ساي.
* هذه الاشياء تثبت ان هناك العديد من المشاكل والقضايا التي لا يعرف المريخ كيف سيكون قرار الاتحاد العام فيها؟.
* المعروف ان مجلس ادارة نادي الهلال سوف يحول ملف طمبل للفيفا اذا لم ينصف الاتحاد العام الهلال.. وهذا يعني ان اللاعب والمريخ سوف يدخلوا في ازمات ومشاكل كثيرة .. قد تضعف تركيز طمبل.
* الغريب في الامر ان المريخ يحاول منذ سنوات تشتيت تركيز لاعبي الهلال.
* كلنا رأينا الحملة (الكضابة) .. والنفخة الفارغة التي استقصدت في الموسم قبل الماضي رباعي الهلال ريتشارد وعمر بخيت ومهند الطاهر وحمودة بشير.
* وقبل هولاء كان الاتجاه نحو المعز محجوب وكلها كان القصد منها اضعاف تركيز لاعبي الهلال.
* في الموسم الماضي رأينا كيف كانت (الشبكة) التي نصبها المريخ علي محترفي الهلال ليفقدوا تركيزهم ويفقد الهلال فيما بعد كأس الممتاز.
* كلتشي كان يلعب في الهلال .. عقله مع المريخ وقلبه مع الهلال .. وكان داريوكان يلعب وهو موقعا للاسماعيلي ويوسف محمد يلعب وهو موقع لسيون السويسري.
* الان المريخ يقع في شر اعماله ... حيث يمر طمبل بالظروف نفسها .. ومثلما يقول الهلالاب ان اللاعب من حق الهلال يقول المريخاب ان اللاعب من حق المريخاب .. واظن ان هذا الشد وحده يكفي لزعزعة استقرار لاعب كان الهاجم الوطني الاول في السودان.
* الراجح ان طمبل عندما يعود للهلال .. سوف تكون العودة من اجل ان يختم مسيرته الرياضية فقط.
* ويمكن ان نقول لطمبل .. اذا طابت النية فان كنبة الهلال بتشيل مية.
* ايداهور هو الاخر سوف يشكل هاجسا للمريخ .. وليس امام المريخ غير احتمالين اما تسجيله بنفس المقابل المادي الذي سجل به كلتشي واما ان اللاعب سوف يرحل.
* حقيقة الامر نحن لا نتمني ايداهور ولا نريد طمبل .. كلاهما اصبحا دون مستوي الهلال .. ولكن مطلوب من الهلال ان يرد علي تحركات المريخ عملا بـ ( وجزاء سيئة سيئة مثلها) ... من بعد كل هذا فان البادي اظلم.
* علي العموم ... تخبط المريخ يوضح منذ الان .. المحترفون لم يصلوا .. والمدرب لم يصل ..والفريق بوضعه الراهن فشل حتي في امتلاك جرأة او قدرة لمواجهة (الجريف) ... رغم ان الهلال (مرقها) للقضارف لمقابلة اشراقة.
* كذلك يحمد للهلال ان ست لاعبين منه لعبوا مع المنتخب في بنين بينما لعب الهلال في القضارف في نفس اليوم ففاز الهلال بالستة.
* ونحمد للمجلس الهلالي انه تعاقد مع المدرب (المدريدي) كامبوس وتعاقد المجلس مع السويركي في وجود باهوس وفتحي بشير وعيسي الهاشماب.
* نتمني ان يحسم المجلس بصورة نهائية امر مساعد المدرب الوطني اضافة الي حسم امر المعسكر الخارجي.
* غير هذا فان العمل في الاستاد يجري بصورة جيدة وسوف يشكل استاد الهلال اضافة كبيرة للفريق بعد الافتتاح .. حيث ينتظر ان يستقبل الاستاد مباريات الهلال الافريقية والمحلية في يوليو القادم.
* ايضا تبدو الصورة واضحة بالنسبة للتسجيلات في يوينو الحالي ونحسب ان مجلس الهلال (عارف هو بعمل في شنو) بعد ان كسب قضيته التي رفعها لاسقاط المادة 14 التي تتنافي مع الدستور السوداني.
* في الاخبار ان الهلال حسم امر اعادة طارق مختار وهو اضافة حقيقة لدفاع الهلال .. ونتمني ان يكون الهلال حسم ايضا امر مدافع الخرطوم نجم الدين لأنه هو الاخر سوف يكون مكسبا للهلال.
* هنالك ايضا ريتشارد ولاعب السيلية وايفوسا وكابوندي .. وما خفي كان اعظم.
* كل هذه الاشياء تؤكد حسن الاعداد للمرحلة المقبلة ...حيث ننتظر اكتمال الهلال بدرا في المجموعات .. وننتظر ايضا ان يفوز الهلال بالممتاز وان يحسن حصاد نقاط الدورة الثانية لتكون له كاملة من غير نقصان ان شاءالله.
* اعود الي المريخ .. واقول ان الامور عنده مازالت (ملخبطة) ..ويطيب لنا مع هذا ان نسترجع (تزويرات) عديدة كانت في المريخ وكانت في اوراق رسمية وهي مثبتة ومتفق عليها حتي من المريخاب.
* وتلك لخبطة اخري.
* اول تلك التزويرات واشهرها كانت في اقرار علاء الدين يوسف للعب في المريخ من خلال (بصمة) مزورة.
* طبعا التزوير في (البصمات) امر لم نسمع به حتي في الافلام الامريكية التي تهتم بالجريمة وتذهب فيها بعيدا.
* كذلك هنالك تزوير في شهادة سعيد السعودي حسب اجتهادات خالد عزالدين .. حيث ولد سعيد السعودي في ام بدة واخرجت له الشهادة من جدة.
* ومن جدة الي امبدة يعني.
* عقد طمبل مع المريخ الان تحوم حوله الشبهات والامر الان كله امام الاتحاد العام ليقول كلمته.
* نتمني فقط ألا يكون قرار الاتحاد العام لكرة القدم حول عقد طمبل مثل قراره حول (بصمة) علاء الدين بعد التزوير الذي حدث فيها.
* لكن علي كل الاحوال فان الهلال جاهزا بمستنداته الي ان يصل للفيفا لتقول كلمتها.
* واذا انصفت الدستورية الهلال فعلي طمبل ان يبلّ رأسه.
* التزوير الاخير والخطير والذي فات علي الناس ان يقفوا عنده بصورة اكبر هو اتهام الاتحاد العام للاعب بدرالدين قلق في (التزوير) في شهادة طبية.
* تزوير تاني ... لو حاسب الاتحاد العام المريخ في (البصمة) لما كان قلق قدم شهادة طبية مزورة.
* ان الامر الذي يجب ان تحاسب فيه لجنة الانضباط اللاعب بدرالدين ينبقي ان يكون (التزوير) في الشهادة الطبية .. قبل السلوك الذي بدر من اللاعب اتجه المدرب استيفن قسطنطين.
* لذلك فان عقوبة قلق الاكبر يجب ان تكون في ذلك التزوير .. لأن ذلك هو الذنب الاكبر.
* ملحوظة: متعودة دائما.
هوامش
* لاعبو المنتخب الوطني حسب امكانياتهم ظهروا بمستوي جيد امام بنيت ولكنهم خسروا.
* المنتخب ينقصه بشكل واضح صانع الالعاب.. وهجوم المنتخب يصل حتي منطقة الجزاء الخاصة بمنتخبنا لاستلام الكرة.
* لذلك فان هجوم منتخبنا اقرب ان يسجل في مرمانا من ان يسجل في مرمي الخصم.
* كذلك فان مكانة علاءالدين يوسف وعمر بخيت في الوسط ماتزال خالية.
* دفاع المنتخب كان جيدا .. ولياقة نجوم المنتخب هي الاخري كانت جيدة.
* طبعا الفريق من يقولوا ليك (لياقتو) كانت جيدة ... اعرف طوالي انو الفريق دا خسر النتيجة.
* اللياقة نعمل بيها شنو من غير انتصار.
* الفرق بين مازدا وقسطنطين .. ان الاول بخسر بالثلاثة.
* ناس الهلال ديل ببالغوا عديل ... قالوا (بصمة) كامبوس ظهرت في لاعبي الهلال.
* رغم ان كامبوس كان قاعد في المقصورة.
* بصمتو دي إلا تكون بصمة فييرا.
* انتوا كامبوس بصم للهلال وإلا ما بصم.
* بصم .. ما بصم ... بصم .. مابصم.
* الهلالاب استفادوا من إلغاء المادة 14 من اللائحة مرتين ... مرة في الهلال ومرة في المريخ.
* ناس الهلال ديل ما بعملوا حاجة ساكت.
* عارفين فائدة الغاء المادة 14 شنو؟.
* إلغاء المادة دي سوف تجعل ايداهور يشارك بصورة رسمية في هجوم المريخ.
* يعني طمبل وكلتشي ح يشكلوا ثنائية في (الكنبة).
* كلتشي في كنبة المريخ .. وطمبل في كنبة الهلال... والسعودي برضو ح يكون في الكنبة.
* مفروض ناس الهلال يصرفوا نظر عن طمبل ... عشان يرتاح في كنبتو.
* سولي شريف يبدو اننا نظلمه كثيرا وهو يملك امكانيات عالية ... سولي سوف يتمسك به مدرب الهلال كامبوس.
* سولي شريف لو كان بشارك بصورة مستمرة سوف يكون افضل لاعب في الدوري السوداني.
* بالمناسبة اين الذين كانوا يطلقون عليه اسم سوري شريف.
* آل سوري آل.
* اظن ان الفرصة اصبحت متاحة لسولي شريف الان .. لذلك ليس من المنطق ان يستغني الهلال عن لاعب عدلت له اللائحة وانصفته المحكمة الدستورية .. وعندما عدلت اللائحة شطب او تمت اعارته.
* لابد ان يجرب سولي شريف عسل إلغاء هذه المادة في الهلال.
* ايفوسا ضايق شديد للعب في الهلال ... الزول دا ضايق اكتر من طمبل.
* يا ايفوسا اصبر ... الدنيا ما طارت.
* يا طمبل قول ليه : نحن فايتنك بالصبر ساكت.
* سداسية الهلال في القضارف .. خمسة منها جاء في الشوط الثاني وهذا يعني نجاح باهوس وفتحي بشير.
* باهوس جعل الشوط الثاني ... شوط خالص للهلال.
* الاندية التي تريد ان تنافس الهلال عليها ان تفكر فقط في الشوط الاول.
* الشوط التاني ... ما تفكروا فيه ... فهو خالص للهلال.
* النعيم رونالدينو متي ما لعب كان نجم المباراة ... سجل وفاز بنجومية المباراة ... بعد كدا يعمل ليك شنو يا قسطنطين؟.
* النعيم رونالدينو اوصي عليه مدرب الهلال السابق دي سانتوس .. واظن ان كامبوس هو الاخر اندهش منه.
* مصر امام الجزائر كانت مثل (موزمبيق) ... المباراة كلها كنت ببحث عن المنتخب المصري.
* لولا هدف ابوتريكة كنت ظنيت ان المنتخب الجزائري يلعب ضد موزمبيق ... رغم محاولات موزمبيق .. اقصد مصر في الشوط الاول.
* المشكلة في مصر ... ان المنتخب المصري عندما يخسر فان الكل يهاجم حسن شحاتة ... حتي نقابة اتحاد الممثلين التي يقودها الدكتور اشرف زكي.
* الكل في مصر يهاجم الان شحاتة.
* انتوا لو شفتوا (قسطنطين) كنتوا عملتوا شنو؟.
* احمدوا الله ساكت.
* خبر عاجل: يا طمبل معليش ... قلنا ليك شيل صورك من المريخ.

من طرف ملك الجو الخميس يونيو 11, 2009 12:21 am

* امس لقيت لي هلالابي (زعلان) ... عيونو متل (القفة الفاضية) ... او زي الفول الما فيه زيت.
* فول في عينك.
* قلت ليه مالك؟... عامل كدا زي (الامريكي) البسمع في اغنية الحقيبة (تيه واتاكا).. ما بفهم فيها اي حاجة.
* بالمناسبة اغنية (تيه واتاكا) التي كتبها (محمد ود الرضي) .. من اصعب اغنيات الحقيبة .. وانت اذا نظرت الي النص ما بتفهم فيه اي حاجة ... إلا اذا يسره اللحن.
* لعل صعوبة النص تأتي من تربية ود الرضي فهو قد جاء بنص فيه لغة البادية .. وربما قصد الشاعر ان يكون النص بهذا (الغموض) .. لأن ود الرضي نفسه نشأ نشأة خلاوي ... لذا كان (غزله) يتواري خلف هذا (الغموض).
تيه واتاكا مراض وصحاح مقله الفتاكا ظبى الرام
خريف وشتاك ميل يابان المصرى اتاك النسام
البى افتاكا جاب لى روايحا لى هتاكا وذادني هيام
ما بيغباك شغفى عليك ومتى اصباك تزيدنى هيام
وترينى صباك ونجري عتاب وحنان نتباكا على الايام
لعلى اراك ضحا تتجلى بطيب واراك و نجري كلام
ويكون سمراك جوارى حسان وبعض امراك وبعده تنام
كفى قفاك بعاد حلماتك من كتفاك درر ومدام
والراح فى فاك شعرك عتمة وبدر صفاك وحسنك تام
غريزة حياك عجيب تستحي من نور محياك داخل السام
ويفوح رياك ينعشنى يجيب خمرا جالياك ولو في منام
* عليكم الله هسع الامريكي لو ترجموا ليه النص دا بقعد في البلد دي .. اغنية زي الحرب العالمية الثانية (مقل فتاكا ..رويح هتاكا).. ود الرضي ذاتو بالغ في هذا النص جعل هنالك (روح) في حرف (الكاف).
* تشعر ان حرف (الكاف) في النص .. (ينطط) من الحياة براه .. زي (المروحة) البتدخلها الكهرباء فجأة.
* علي العموم انا لم ات بهذا النص من فراغ .. واغنية (تيه واتاكا) .. بتذكرني (الباك) وقت يقيف قدام (امبيلي) .. يقعد يرجف متل (شية الجمر) ... الباك بقعد (يتيه ويتاكا) .. وامبيلي شغال تبديل متل (الفاصل الاخير) في الحفلة ... الناس كلها بتنزل الدارة.
* الزول الكنت فاكرو محترم وتقيل .. تلقاه نازل.
* ارجع ليكم لي الهلالابي الزعلان ... قلت ليه مالك؟ ... (نجيلتكم) جابت ليها (شوك).
* قال لي :ابدا.
* سوركم طلع عاوز يقرأ؟.
* قال لي: ابدا.
* طمبل طار؟.
* ابدا.
* طيب مالك يا ود الناس؟.
* قال لي انت امس نسيت (تزويرات) هامة ... عشان كدا انت الظاهر عليك قاعد تزور في التاريخ.
* بعدين تعال هنا .. انت البخليك تستغرب شنو في زول (يلدو) في (جدة) ويطلعو ليه شهادة في (ام بدة) ... الموضوع دا عادي .. بحصل في ارقي العائلات.
* ناس المريخ ديل جابو (فرانسيس) من الولايات المتحدة الامريكية .. وطلعوا ليه شهادة ميلاد من (الحاج يوسف) .. ناس عملوا الحكاية دي .. بغلبهم يطلعوا ليهم شهادة ميلاد من ام بدة لزول مولود في جدة.
* غايتو جنس تزويرات.
* انا اول مرة اشوف لي ناس يزوروا ليهم صورة (اشعة).
* باقي ليكم ناس زوروا (البصمة) غالبهم يزوروا صورة (الاشعة).
* بمناسبة البصمة دي ... الهلالاب الي الان بتغالطوا في (بصمة) كامبوس.
* زي ما قلت ليكم امس ... بصمة كامبوس قالوا ظهرت في الهلال.
* انتوا كمان ما تبالغوا يا ناس الهلال.
* بصمة شنو البتظهر في اسبوع.
* بصمة هي ... وإلا حنة؟... البتظهر من اول (ختة).
* بصمة علاءالدين يوسف ليها اكثر من سنتين مع ذلك لم تظهر حتي الان.
* معقولة بصمة كامبوس تظهر في اسبوع.
* في واحد جاء من القضارف .. قال الشغل الظهر في الهلال دا ... ما شغل مدرب ساكت .. دا شغل كامبوس.
* الكمبسة ظاهرة ... المدردة واضحة ... (المدردة دي من مدريد).
* كمان نحن شغل كامبوس ما بنعرفو.
* مسكين دي سانتوس .. قعد ست شهور .. ما في زول اتكلم عن بصمتو.
* الظاهر دي سانتوس ما عندو (بصمة).
* دي سانتوس بوقع ... ما ببصم.
* الزول الجانا من القضارف .. يشيل ويغالط في الناس.
* قال بصمة كامبوس في (سمسم القضارف) ظهرت ... ما عاوزنها تظهر في الهلال.
* قالوا ليك (سمسم القضارف) .. اتجاوز ليه مرحلتين .. ودخل طوالي لمرحلة (الحصاد).
* عشان كدا ناس (وليد درزون) ديل قالوا تاني كل سنة بدعوا الهلال للقضارف .. عشان موسم (السمسم) ينجح في القضارف.
* سمسمكم طبعوا كعب يا ناس القضارف.
* السمسم مسكين ... كان عاوز يموت من العطش.
* المطر في القضارف ما جات ... لكن الهلال مشي القضارف .. قام بواجب المطرة واكتر.
* هسع الناس الغالاطة .. يفكوا اي حاجة ويمكسوا في المطر.
* ح تمطر .. ما ح تمطر .. ح تمطر .. ما ح تمطر.
* غايتو يا علاء الدين يوسف دخلت ليك عادة كعبة في الوسط الرياضي.
* اي اتنين بتقابلوا .. بقوا يقعدوا يتغالطوا... بصم .. ما بصم ..بصم.
* ناس الاتحاد العام ...قالوا (صورة الاشعة) الجابها ليهم قلق .. لقوها صورة (عيد ميلاد).
* ناس الاتحاد العام يمكن يكونوا فعلا ما بفرزوا فييرا من قلق .. لكن ما لدرجة انهم ما بفرزوا صورة عيد الميلاد .. من صورة الاشعة.
* ناس الاتحاد ديل بقوا (مفتحين).... عملوا ليهم (نضارات).
* انا خائف لجنة الانضباط تستدعي قلق.
* يقوموا ناس المريخ يرسلوا للجنة الانضباط (مجاهد) ... عشان مجاهد (مصاب).... وعاوزين يتخارجوا منو.
* الزمن دا ما في حاجة مضمونة.
* تقوم اللجنة تفتكر مجاهد .. (قلق).... اصلو هم ما بركزوا كويس...(البصمة نموذج).
* لكن اللجنة برضو بتتلخبط ... بدل ما تعاقب مجاهد الماثل امامها تعاقب (الشغيل).
* شفتوا (اللخبطة) دي كيف؟.
* يقوموا ناس المريخ يعترضوا ... يقوموا يستأنفوا.
* لكن بدل ما يستأنفوا لي (الشغيل) .. يقوموا يستأنفوا للسعودي.
* لجنة الاستئنافات تفتكر المستأنف له عبدالحميد السعودي ... وناس المريخ قاصدين سعيد السعودي.
* يقوموا شنو تاني؟.
* يقوم المريخ يمشي (المفوضية) ... لكن في المفوضية بدلا من تصحيح وضع السعودي ... يقوموا يصححوا وضع (بلة جابر).
* بلة جابر هسع مالو.
* المفوضية تخاطب الاتحاد العام ... لكن بدلا من ان تخاطبه عن بلة جابر ... يقوموا يخاطبوه عن (سفاري).
* يقوم الاتحاد العام بدل ما يرفع العقوبة عن سفاري .. يقوم يرفع العقوبة عن فاروق جبرة.
* لكن الاتحاد بدل ما يخاطب المريخ في شأن فاروق جبرة .. يخاطب المريخ عن سليمان عبدالقادر.
* شفتوا التزوير دا كيف؟.
* برضو تقولوا لي بصمة كامبوس ما ظهرت في سمسم القضارف.
* متي تجتمع لجنة الانضباط؟.
* بالمناسبة .. يا طمبل .. عملت شنو في (صورك) العند ناس المريخ.
* شيل صورك .. ورجع ليهم قروشهم ... عشان تبقوا حبايب.
* (وعنو ما حدش حوش).
* ملحوظة: وتيه واتاكا... امبيلي جاكا.
هوامش
* دكتور كمال شداد قال بعد قرار المحكمة الدستورية لو عاوز اي فريق يجنس 28 لاعبا ما عندو مشكلة.
* يا شداد انت ما عارف ناس الهلال ديل... لو اعطيتهم الفرصة دي الي شهر ديسمبر ناس الهلال بكونوا جنسوا (نيجيريا) كلها .. وقبلوا علي (الكنغو).
* ومشكلة كمان لو اتجهوا الي (الصين).
* الصين دي كلها يمكن صلاح ادريس يجنسها ليكم.
* اصلو سمعت ان الهلال عاوز يجيب ليه (مشجعين) من الصين بنظام الاحتراف استعدادا لكاس الاندية لابطال القارات في دبي.
* يعني مباراة القمة القادمة في مرحلة المجموعات ناس المريخ لما يدخلوا استادهم بلقوا الاستاد كلو (صينيين).
* التشجيع تاني بالصيني.
* قالوا الاتحاد العام رفض سفر هيثم طمبل مع المريخ لمعسكر الاسماعيلية ما عشان المنتخب الوطني.
* عارفين عشان شنو؟.
* ما عارفين ما تغالطوا ساكت.
* الاتحاد رفض سفر طمبل مع المريخ ... عشان طمبل اصبح من حق الهلال.
* طمبل ح يمشي الاسكندرية .. ما ح يمشي الاسماعيلية.
* يعني ما معقول يكون هو لاعبا في الهلال ويعسكر في المريخ.
* انتو عاوزنو يبقي زي كلتشي ... هو موقع للمريخ وبيلعب للهلال.
* بالمناسبة سعيد السعودي ... مفكوك متين؟.
* قالوا ناس الهلال جماعة اتحركوا علي ام بدة... وجماعة اتحركوا علي جدة.
* انتوا اقعدوا احرسوا لي طمبل.
* طمبل ح يتفرغ في الايامات القادمة للتصريحات.
* يعني اقنعوا منو يا ناس المريخ.
* نحن طمبل طبعا ما عندنا ليه اكتر من (الكنبة).
* لكن كنبتنا ولا كابتنية الوصيف.
* كنبتنا بعد النجيلة بقت رهيبة.
* بعد السياج .. ما بقعد فيها زول ساكت.
* قالوا ناس المريخ بغنوا للنعيم رونالدينو ... (راعي حرماني .. واخشي عامل السن).
* المريخاب نسوا العجب وطمبل ... وبقوا يطاردوا في النعيم.
* حطموا موهبة عبدالحميد السعودي ... وعاوزين يحطموا موهبة النعيم.
* النعيم ...بشرب في الصنعة من سيدا.
* مباراة الهلال غدا امام اشراقة سوف يقدم فيها النعيم رونالدينو عرض خاص.
* امبيلي ... اي زول لو عاوز (يتخلع) بكرة يدخل استاد الخرطوم من بدري.
* الخلعة بكرة مجاني.
* نجيلة الهلال قالوا عملت ليها (ضنيب قش).
* السور قالوا ..... اتحرك.
* خبر عاجل : يا طمبل ساعدنا بالصفقة... (الصور) شلتها وإلا لسع؟.

من طرف واحد من الناس الجمعة سبتمبر 04, 2009 10:24 pm

في اندونيسا ...25 نوع للشاي..تبدأ بالشاي الاخضر وتنتهي بالشاي الاحمر وبينهما (اشكال والوان)..شاي باليانسون..وشاي بالنعناع...وشاي من غير نعناع.
* نحن الحاجات دي عندنا في البلد دليل (فياقة)...اذ انك تحتاج الي (كاتلوج) عشان تختار ليك شاي وتشربو.
* يعني لو مشيت ليك قهوة في اندونيسا تشيل هم من (الجارسون).
* الجارسون يدخلك في اضافرك وهو يتلو عليك اسماء الشاي.
* عاوز ليك سنة عشان تحفظ انواع الشاي في اندنوسيا.
* وما يحدث في اندونيسا يحدث في مصر اذ يوجد اكثر من 30 نوع من الفول المصري.
* فول بالزيت الحار وفول اسكندراني وفول بالفلافل وهلم جرا.
* في مصر لو عاوز تأكل ليك فول عاوز ليك دبلوم (فلولوة).
* عاوز ليك كورس عالي في اسماء الفول.
* نحن برضو بنعتبر الموضوع دا (فياقة) ساكت..شنو يعني فول سادة وإلا فول بالجبنة.. في النهاية كلو فول.
* طبعا في ناس عندهم مزاج معين مع الفول.
* الفول دا لو ما جهزوا براهم ما بتكيفو.
* اول حاجة يغسلو الصحن...ويدفقو موية غسيل الصحن بالشباك.
* الساعة ديك اذاعة ام درمان بتكون شغالة..ولو ما بخاف الكذب عبدالعزيز محمد داؤود بغني في اغنية الدكتور الزين عباس عمارة (أوتذكرين صغيريتي او ربما لا تذكرين).
* وانت بتصلح في الفول وبتغسل في السلطة وتنفض في الجرجير ..وكل لحظة والتانية تعاين للطماطم الموضوعة في صحن براها.
* في ناس كدا...البصلة يخلوها برة...والشمار يبخو فوق الفول.
* العجيبة الناس البصلحو الفول ..ما بياكلو...بستمتعوا بمشاهدة الناس التانية وهم بضربو في الفول.
* الفول لو سمح ما بكمل..بقطع ليك اي كمية من العيش.
* عشان كدا لو صلحتوا الفول..خلوا يكون قريب منك ولد واقف في الباب من يسمع كلمة يااااااااا.
* يجيك جاري بي كيس العيش... تقول واقف في الصينية.
* مطاعم السودان عندنا طبعا هي ذاتها ما بتقصر..الفول دا عملوا بي اي شيء.
* فول بالجبنة وفول بالكبدة وفول بالدكوة وفول بالفسيخ.
* غايتو علمكم دا لو عملتوه في حاجة غير الفول ...كان وصلتوا القمر.
* لكن يا خسارة...بحوثكم كلها بتكبوها في الفول.
* انتوا ما شفتوا ليكم ناس كدا ..كل واحد منهم يطلع بعد فترة ويقول ليك : (والله اكتشفت لي مكان الجن الاحمر ما يعرفو).
* تقول ليه : اكتشفت شنو؟.
* يقول ليك في بحري في محل فول فتح جديد...غايتو فول انا من الله خلقني ما شفتو متلو.
* واحد تاني يقول ليك : اكتشفت ليك حاجة عجيبة.
* تقول ليه : اكتشفت شنو؟.
* يقول ليك : شفت الفول...هو في النار قبل ما تنزلو اديهو شوية (باكنبودر)..ببقي ليك احمر متل عين الديك.
* اها عليكم الله اجتهاداتكم دي لو عملتوها لينا في (القمر) ما كنتوا حيرتوا لينا (الروس) ديل.
* موضوع الفول دا شايفو طول شوية.
* رأيكم شنو امسك ليكم (الجبنة).
* الليلة عاوز احدد ليكم (الفياقة).
* في فرنسا وحدها قيل في قرابة الـ (150) نوع من الجبن...الكلام دا قبل كم سنة.
* هسع يمكن انواع الجبن في فرنسا تضاعفت فوق هذا الرقم.
* في فياقة اكتر من كدا....150 نوع من انواع الجبنة.
* يعني لو مشيت فرنسا..شيل ليك (بخرة) معاك لو عاوز تشتري ليك (جبنة).
* انا ما عارف وقت فرنسا دي براها فيها 150 نوع من انواع الجبنة..الفضل في فرنسا تاني شنو؟.
* اتذكر علي هذا احد المواقف التي لا اعرف مصدرها ولا اعرف تفاصيلها بدقة لانها عرضت علي قبل سنوات.
* في فرنسا قيل ان احد المسؤولين اطيح به من الحكم...واخرج من السلطة..فكان ان قال ذلك المسؤول بعد ان خرج من السلطة: كيف لي ان احكم بلد فيها 150 نوع من (الجبن).
* بيني وبينكم الموضوع صعب شوية.
* علي هذا فان هولندا يكون فيها 500 نوع من انواع الحليب.
* الحاجات دي انا ما قلتها ليكم من فراغ.
* قلتها ليكم وانا راقد لي فوق رأي.
* الشاي والفول والجبنة دي بتذكرني بي شكاوى المريخ ومزاعم اعلامه عن عدم صحة تسجيل سادومبا وكابوندي نتيجة للتزوير الذي اشاعوه حول اعارة امولادي ودي سوزا.
* يجوهم بي هنا ..يطلعوا ليك بي هناك.
* شداد قال ليهم خطوات الهلال دي كلها صاح..قال ليهم في 30 عضو من كبار قادة الكرة في البلاد راجعوا خطوات اعارة امولادي ودي سوزا..وكلهم المريخي والهلالي منهم اكد صحة الاجراءات.
* هم قالوا لا..في خطاب من الاتحاد النيجيري وصل عبر البريد الكتروني اتمسح.
* شداد قال ليهم ما في كلام زي دا...خطاب يتمسح براه دا إلا يكون في الاصل ما اترسل.
* جماعتكم قالوا انتظروا الـ (دي اتش ال).
* انتظرنا الـ (دي اتش ال)...شداد استلم الخطاب ورماه في سلة المهملات.
* الكلام دا ما عجبهم... قعدوا يطنطنوا.
* الغريبة انو مع طنطنتهم دي عندهم (نقطتين).
* شداد قال ليهم امشوا الاتحاد الافريقي ..اشتكوا هناك...نحن البطولة الافريقية دي ما عندنا فيها دخل.
* الجماعة مشوا..وكمال شداد من خزينة الاتحاد دفع ليهم رسوم الشكوى.
* في تعاون اكتر من كدا.
* الاتحاد الافريقي عاين للشكوى كدا..قعدوا يضحك.
* عرفوا ليك المريخ اول مرة يلعب في بطولة الاندية الافريقية للابطال.
* رفضوا الشكوى (شكلا)...شكلا دي بتقطع المصارين.
* الفصاحة ديك..كلها طلعت في الفاضي.
* الشكوى ما بعرفوا يكتبوها.
* طيب بتتفاصحوا في شنو؟.
* شهرين بتتكلموا عن الموضوع دا وغالبكم تكتبوا الشكوى.
* عماد الطيب قال ليهم: انتوا تلامذة ساكت..الشغل دا كبير عليكم.
* انتوا ابعد حاجة يمكن تصلوا ليها (الطابق التاني).
* نحن قبيل شن قلنا.
* سا شنو؟.. سا سا سادومبا.. وكا شنو؟.. كا كا كابوندي.
* المريخاب طبعا زي حكاية (الجبن) في فرنسا...فيه 150 نوع.
* قالوا كانو بيلازر ح يشتكي ...وح يكتب الشكوى صاح.
* لكن (شفوت) الهلال ديل مفتحين..عين مفتحة وعين مغمضة.
* ما بتحورجوا لينا.
* الاتحاد الافريقي رفض شكوى كانو بيلازر في سادومبا.
* يعني شكوى رفضوها شكلا.. وشكوى رفضوها موضوعا.
* قلنا ليكم سا.. شنو؟.
* سا سا سادومبا...وكا ..شنو؟....كا كابوندي.
* وشكوى رفضت شكلا وشكوى موضوعا.
* موضوعا دي تقطع الطوحال.
* نحن اي حاجة عندنا بي نظام...تاني بتقولوا شنو؟.
* اقول ليكم حاجة ..قولوا النعيم رونالدينو بقي ما بربط شعرو.
* يمكن يقبلوها ليكم المرة دي شكلا..ويرفضوها موضوعا.
* في منطق اكتر من كدا...تعرفوا الموضوع دا عاوز (من الغلاف للغلاف).
* ما تستعجلوا اصبروا بس.. عدم الصبر كتل الفيل.
* قولوا ما عارفين الفيل كمان؟.
* اذن الحكاية بقت واضحة كدا...شكوى رفضت شكلا وشكوى موضوعا ..يعني زي نظام الفول في مصر والشاي في اندنوسيا والجبن في فرنسا واللبن في هولندا.. هولندا في عينك.
* ملحوظة: عين منو يا ابو الشباب؟.
هوامش
* بشري سارة لجمال الوالي..كنبة استاد الهلال مريحة وممتازة..يعني ممكن تأخذ فيها راحتك.
* انا عرفت ليه مجلس المريخ ما بعرف يكتب الشكاوى.
* المجلس يكتب شكوى كيف ورئيس النادي بقعد في الكنبة.
* خلاص يا الهلالاب ..عاوزين تفكوا المطر...وتفكوا الفيضانات وتمسكوا في جلوس جمال الوالي في الكنبة.
* غايتو الهلالاب ديل ما يشوفوا ليهم حاجة.
* انتوا صديق علي صالح دا منو؟.. الاسم دا ما غريب علي.
* الزول دا لسع شغال في القطاع الرياضي.
* جمال الوالي يدفع..وجمال الوالي يقعد في الكنبة ..وجمال الوالي يوقع العقد...وهمد وصديق علي صالح يصرحوا في الجرائد.
* المريخاب بحاولوا يسخنوا القمة بهذه التصريحات.
* الهلالاب مفروض ما يشتغلوا بالحاجات دي.
* الجماعة ديل عاوزين يشتتوا تركزيكم...اصلو ما عندهم امل.
* يا ناس الهلال خلوا ناس المريخ يتشحنوا...اما انتم فابقوا علي تركيزكم وحافظوا علي مزاجكم.
* القمة القادمة نريد ان ندخلها في هدوء.
* عاوزين نلعبها بي مزاج.. عاوزين نتمتع بيها.
* رائع ان اعلام الهلال يقود القمة الان الي الهدوء الذي يريد.
* مباراة القمة سوف تلعب في استاد الهلال وهذا يعني ان نختار الاسلوب الذي نريد والظروف التي نحبها.
* لا تتركوا المريخاب يختاروا ليكم (الاسلحة) التي يحسنوا ان يصرعوكم بها.
* لا تدعوهم يختاروا الاسلوب الذي سوف تنازلوهم به.
* نحن نريدها قمة هادية..قمة ممتعة...قمة بعيدة عن الضغوط والتشنج والانفعال.
* نريدها قمة نظيفة حتي نحقق فيها انتصارا نزيها.
* سوف اردد هذه الملاحظات كثيرا..فلا تملوني.
* خبر عاجل: كلما تقترب القمة سوف نكون اكثر سعادة.

خربشات محمد عبد الماجد صفحة متجدده

خربشات محمد عبد الماجد صفحة متجدده

رد: خربشات محمد عبد الماجد صفحة متجدده

تزوير في اوراق رسمية

تيه واتاكا

شكوى رفضوها (شكلا)..وشكوى (موضوعا)